Семей қаласында жас геологтардың II Республикалық далалық олимпиадасының салтанатты ашылуы өтті

09 июля 2025 года.

Бүгін Семей қаласындағы Геологиялық барлау колледжінде жас геологтардың II Республикалық далалық олимпиадасының салтанатты ашылуы өтті. Іс-шараға Қазақстанның әртүрлі өңірлерінен келген 9–11-сынып оқушыларынан құралған 15 команда қатысты. Қатысушыларды жалпы білім беретін мектептер, колледждер және геологиялық үйірмелер атынан келген жастар таныстырады.

Қатысушыларға Қазақстан Республикасы Индустрия және құрылыс министрлігі Геология комитетінің «ШығысҚазЖерҚойнауы» РМК басшысы Серік Айкешев құттықтау сөз сөйледі. Ол олимпиаданың жастар арасында геологиялық ғылымдарды насихаттауда және болашақта еліміздің минералдық-шикізат базасын дамытуға үлес қоса алатын дарынды оқушыларды анықтауда маңызды рөл атқаратынын атап өтті.

«Жас геологтар олимпиадасы – бұл жай ғана білім сайысы емес. Бұл – еліміздің түкпір-түкпірінен келген ынталы, мақсатты оқушыларды біріктіретін бірегей алаң. Қатысушылардың көбі бұған дейін де қатысқан, бұл геология саласына деген қызығушылықтың артып келе жатқанын көрсетеді», – деді «Kazakhmys Barlau» ЖШС атқарушы директоры Қадыржан Қаулдашев.

Іс-шараның ұйымдастырушылық және әдістемелік негізін Корпоративтік «Жас геолог» қоры қамтамасыз етуде. Қор көптеген жылдар бойы жастар арасында геологиялық білім беруді дамытуға бағытталған бастамаларды жүйелі түрде қолдап келеді. Қордың бастамасымен аймақтарда геологиялық үйірмелер жұмыс істеп, талантты оқушыларға кәсіби даму мен білім алу мүмкіндігі ұсынылуда.

Олимпиада аясында келесі бағыттар бойынша жарыстар өтеді: далалық тұрақ ұйымдастыру, қауіпсіздік техникасы негіздері, палеонтология, магнитометрия, минералогия және петрография, шлихты байыту, гидрогеология, мұнай және газ іздеу, геологиялық қима жасау, геологиялық маршрут.

Жеке есепте жеңімпаз атанған оқушылар еліміздің жетекші жоғары оқу орындарында білім алу үшін гранттарға ие болады: Satbayev University, Қазақстан-Британ техникалық университеті, С. Өтебаев атындағы Атырау мұнай және газ университеті, А. Сағынов атындағы Қарағанды техникалық университеті.

Олимпиаданың өтуіне ҚР ИҚМ Геология комитеті, Семей қаласындағы Геологиялық барлау колледжі және жер қойнауын пайдаланушы жетекші компаниялардың қолдауы арқасында мүмкіндік туды. Олимпиаданың серіктестері қатарында – Kazakhmys, ERG(https://www.erg.kz/ru ), Kazzinc, Yer-Tai, Геокен, «Алел» Қаржы-инвестициялық корпорациясы, Эмбамунайгаз, ProLabSupport және Solidcore Resources.

Олимпиада 2025 жылдың 15 шілдесіне дейін жалғасады. Негізгі мақсат — мектеп оқушыларының геологиялық ғылымдарға қызығушылығын арттыру, ерте кәсіби бағдар беру, геология ғылымын және оның қолданбалы маңызын танымал ету, дарынды жастарды анықтап, оларды қолдау, сондай-ақ оқушылардың назарын геоэкология мен жер қойнауын қорғау мәселелеріне аудару.